ตติยํ เมตฺตคุตฺเถราปทานํ (๔๐๓)

---

[๔๐๕] หิมวนฺตสฺส อวิทูเร อโสโก นาม ปพฺพโต ตตฺถาปิ อสฺสโม มยฺหํ วิสุกมฺเมน ๑ มาปิโต ฯ สุเมโธ นาม สมฺพุทฺโธ อคฺโค การุณิโก มุนิ นิวาสยิตฺวา ปุพฺพเณฺห ปิณฺฑาย เม อุปาคมิ ฯ อุปาคตํ มหาวีรํ สุเมธํ โลกนายกํ ปคฺคยฺห สุคตปตฺตํ ๒ สปฺปิเตลํ อปูรยึ ฯ ทตฺวานาหํ พุทฺธเสฏฺเฐ สุเมเธ โลกนายเก อญฺชลึ ปคฺคเหตฺวาน ภิยฺโย หาสํ ชเนสหํ ฯ อิมินา สปฺปิทาเนน เจตนาปณิธีหิ จ เทวภูโต มนุสฺโส วา ลภามิ วิปุลํ สุขํ ฯ วินิปาตํ วิวชฺเชตฺวา สํสรามิ ภวาภเว ตตฺถ จิตฺตํ ปณิธิตฺวา ลภามิ อจลํ ปทํ ฯ ลาภา ตุยฺหํ สุลทฺธนฺเต ยํ มํ อทฺทกฺขิ พฺราหฺมณ ๓ มม ทสฺสนมาคมฺม อรหตฺตํ คมิสฺสติ ๔ ฯ วิสฺสฏฺโฐ โหหิ มา ภายิ อธิคนฺตฺวา มหายสํ มมํ หิ สปฺปึ ทตฺวาน ปริโมกฺขาสิ ชาติยา ฯ อิมินา สปฺปิทาเนน เจตนาปณิธีหิ จ เทวภูโต มนุสฺโส วา ลภามิ วิปุลํ สุขํ ฯ #๑ ม. วิสกมฺเมน ฯ ๒ ยุ. สุภกํ ปตฺตํ ฯ ๓ ยุ. พฺราหฺมโณ ฯ #๔ ม. ภวิสฺสติ ฯ ยุ. ภวิสฺสสิ ฯ