อิตฺถํ สุทํ อายสฺมา ติสฺสเมตฺเตยฺโย เถโร อิมา คาถาโย อภาสิตฺถาติ ฯ ติสฺสเมตฺเตยฺยตฺเถรสฺส อปทานํ สมตฺตํ ฯ ทุติยํ ปุณฺณกตฺเถราปทานํ (๔๐๒)

---

[๔๐๔] ปพฺภารกูฏํ นิสฺสาย สยมฺภู อปราชิโต อาพาธิโก จ ๑ โส พุทฺโธ วสติ ปพฺพตนฺตเร ฯ มม อสฺสมสามนฺตา ปนาโท อาสิ ตาวเท พุทฺเธ นิพฺพายมานมฺหิ อาโลโก ๒ อาสิ ตาวเท ฯ ยาวตา วนสณฺฑสฺมึ อจฺฉโกกตรจฺฉโย พาลา ๓ จ เกสรี สพฺเพ อภิกุชฺชึสุ ๔ ตาวเท ฯ อุปฺปาทํ ๕ ตมหํ ทิสฺวา ปพฺภารํ อคมาสหํ ตตฺถทฺทสาสึ สมฺพุทฺธํ นิพฺพุตํ อปราชิตํ ฯ สุผุลฺลํ สาลราชํว สตรํสีว อุคฺคตํ วีตจฺจิตํว องฺคารํ นิพฺพุตํ อปราชิตํ ฯ ติณํ กฏฺฐญฺจ ปูเรตฺวา จิตกํ ตตฺถกาสหํ จิตกํ สุกตํ กตฺวา สรีรํ ฌาปยึ อหํ ฯ สรีรํ ฌาปยิตฺวาน คนฺธโตยํ สโมกิรึ อนฺตลิกฺเข ฐิโต ยกฺโข นามํ อคฺคหิ ตาวเท ฯ #๑ ยุ. ... ว โย ... ฯ ๒ ม. อาโลโก อุทปชฺชถ ฯ ๓ ม. ยุ. วาฬา ฯ #๔ ม. ยุ. อภิคชฺชึสุ ฯ ๕ ม. อุปฺปาตํ ฯ