---

[๑๖๑๙] กปิลวตฺถุนิทานํ ฯ (อุปสงฺกมนํ กาตพฺพํ) ฯ เอกมนฺตํ นิสินฺนํ โข มหานามํ สกฺกํ ภควา เอตทโวจ จตูหิ โข มหานาม ธมฺเมหิ สมนฺนาคโต อริยสาวโก โสตาปนฺโน โหติ อวินิปาตธมฺโม นิยโต สมฺโพธิปรายโน ฯ กตเมหิ จตูหิ ฯ อิธ มหานาม อริยสาวโก พุทฺเธ อเวจฺจปฺปสาเทน สมนฺนาคโต โหติ อิติปิ โส ภควา ฯเปฯ สตฺถา เทวมนุสฺสานํ พุทฺโธ ภควาติ ฯ ธมฺเม สงฺเฆ ฯ อริยกนฺเตหิ สีเลหิ สมนฺนาคโต โหติ อกฺขณฺเฑหิ ฯเปฯ สมาธิสํวตฺตนิเกหิ ฯ อิเมหิ โข มหานาม จตูหิ ธมฺเมหิ สมนฺนาคโต อริยสาวโก โสตาปนฺโน โหติ อวินิปาตธมฺโม นิยโต สมฺโพธิปรายโนติ ฯ

---

[๑๖๒๐] จตฺตารีมานิ ภิกฺขเว โสตาปตฺติยงฺคานิ ฯ กตมานิ จตฺตาริ ฯ สปฺปุริสสํเสโว สทฺธมฺมสฺสวนํ โยนิโสมนสิกาโร ธมฺมานุธมฺมปฏิปตฺติ ฯ อิมานิ โข ภิกฺขเว จตฺตาริ โสตาปตฺติยงฺคานีติ ฯ สคาถกปุญฺญาภิสนฺทวคฺโค ปญฺจโม ฯ ตสฺสุทฺทานํ อภิสนฺเทน ตโย วุตฺตา ทุเว มหทฺธเนน จ ภิกฺขุ ๑ นนฺทิยภทฺทิยํ มหานามงฺเคน เต ทสาติ ฯ _____________ #๑ ม. สุทฺธํ นนฺทิยํ ภทฺทิยํ ฯ