ปญฺจตฺตึโส เอกปทุมวคฺโค ปฐมํ เอกปทุมิยตฺเถราปทานํ (๓๔๑)

---

[๓๔๓] ปทุมุตฺตโร นาม ชิโน สพฺพธมฺมาน ปารคู ภวาภเว วิภาเวนฺโต ตาเรติ ๑ ชนตํ พหุํ ฯ หํสราชา ตทา โหมิ ทิชานํ ปวโร อหํ ชาตสฺสรํ สโมคยฺห กีฬามิ หํสกีฬิตํ ฯ ปทุมุตฺตโร โลกวิทู อาหุตีนํ ปฏิคฺคโห ชาตสฺสรสฺส อุปริ อาคจฺฉิ ตาวเท ชิโน ฯ ทิสฺวานหํ เทวเทวํ สยมฺภุํ โลกนายกํ วณฺเฏ เฉตฺวาน ปทุมํ สตฺตปตฺตํ มโนรมํ ฯ มุขตุณฺเฑน ปคฺคยฺห วิปฺปสนฺเนน ๒ เจตสา อุกฺขิปิตฺวาน คคเน พุทฺธเสฏฺฐํ อปูชยึ ฯ ปทุมุตฺตโร โลกวิทู อาหุตีนํ ปฏิคฺคโห อนฺตลิกฺเข ฐิโต สตฺถา อกาสิ ๓ อนุโมทนํ ฯ อิมินา เอกปทุเมน เจตนาปณิธีหิ จ กปฺปานํ สตสหสฺสํ วินิปาตํ น คจฺฉสิ ฯ อิทํ วตฺวาน สมฺพุทฺโธ ชลชุตฺตมนามโก มม กมฺมํ ปกิตฺเตตฺวา อคมา เยน ปตฺถิตํ ฯ #๑ ม. ตาเรสิ ฯ ๒ ม. ยุ. ปสนฺโน โลกนายเก ฯ ๓ ม. ยุ. อกาเม ฯ