สห คาถํ สุณิตฺวาน ปุพฺพกมฺมํ อนุสฺสรึ เอกาสเน นิสีทิตฺวา อรหตฺตํ อปาปุณึ ฯ ชาติยา สตฺตวสฺโสหํ อรหตฺตํ อปาปุณึ อุปสมฺปาทยิ พุทฺโธ คุณมญฺญาย จกฺขุมา ฯ ทารโกว อหํ สนฺโต กรณียํ สมาปยึ กึ เม กรณียํ อชฺช สกฺยปุตฺตสฺส สาสเน ฯ สตสหสฺเส อิโต กปฺเป ยํ กมฺมมกรึ ตทา ทุคฺคตึ นาภิชานามิ สทฺธมฺมสฺสวเน ผลํ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ธมฺมสฺสวนิโย เถโร อิมา คาถาโย อภาสิตฺถาติ ฯ ธมฺมสฺสวนิยตฺเถรสฺส อปทานํ สมตฺตํ ฯ ทสมํ อุกฺขิตฺตปทุมิยตฺเถราปทานํ (๓๔๐)

---

[๓๔๒] นคเร หํสวติยา อโหสึ มาลิโก ตทา โอคาเหตฺวา ปทุมสรํ สตฺตปตฺเต ๑ โอจินามหํ ฯ ปทุมุตฺตโร นาม ชิโน สพฺพธมฺมาน ปารคู สห สตสหสฺเสหิ สนฺตจิตฺเตหิ ตาทิภิ ฯ #๑ ม. สพฺพตฺถ สตปตฺตนฺติ ทิสฺสติ ฯ