ฆรโต นิกฺขมนฺตสฺส สยมฺภู อคฺคปุคฺคโล วีถิยํ ๑ ฐิตโก สตฺถา อกาสิ อนุโมทนํ ฯ ปสนฺนจิตฺโต สุมโน โย เม ปาทาสิ ๒ สาฏกํ ตมหํ กิตฺตยิสฺสามิ สุณาถ มม ภาสโต ฯ ตึสกปฺปสหสฺสานิ เทวโลเก รมิสฺสติ ปญฺญาสกฺขตฺตุํ เทวินฺโท เทวรชฺชํ กริสฺสติ ฯ เทวโลเก วสนฺตสฺส ปุญฺญกมฺมสมงฺคิโน สมนฺตา โยชนสตํ ทุสฺสจฺฉนฺนํ ภวิสฺสติ ฯ ฉตฺตึสกฺขตฺตุํ ราชา จ จกฺกวตฺติ ภวิสฺสติ ปเทสรชฺชํ วิปุลํ คณนาโต อสงฺขยํ ฯ ภเว สํสรมานสฺส ปุญฺญกมฺมสมงฺคิโน มนสา ปตฺถิตํ สพฺพํ นิพฺพตฺติสฺสติ ตาวเท ฯ โกเสยฺยกมฺพลานิ ๓ จ โขมกปฺปาสิกานิ จ มหคฺฆานิ จ ทุสฺสานิ ปฏิลจฺฉติยํ นโร ฯ มนสา ปตฺถิตํ สพฺพํ ปฏิลจฺฉติยํ นโร เอกทุสฺสสฺส วิปากํ อนุโภสฺสติ สพฺพทา ฯ โส ปจฺฉา ปพฺพชิตฺวาน สุกฺกมูเลน โจทิโต โคตมสฺส ภควโต ธมฺมํ สจฺฉิกริสฺสติ ฯ อโห เม สุกตํ กมฺมํ สมฺพุทฺธสฺส ๔ มเหสิโน เอกาหํ สาฏกํ ทตฺวา ปตฺโตมฺหิ อมตํ ปทํ ฯ #๑ ม. ยุ. วิถิยํว ฐิโต สตฺถา อกาเม อนุโมทนํ ฯ ๒ ม. อทาสิ ฯ #๓ ม. โกเสยฺยกมฺพลิยานิ ฯ ๔ ม. ยุ. สพฺพญฺญุสฺส ฯ