อิตฺถํ สุทํ อายสฺมา ปภงฺกโร เถโร อิมา คาถาโย อภาสิตฺถาติ ฯ ปภงฺกรตฺเถรสฺส อปทานํ สมตฺตํ ฯ สตฺตมํ ติณกุฏิทายกตฺเถราปทานํ (๓๓๗)

---

[๓๓๙] นคเร พนฺธุมติยา อโหสึ ปรกมฺมิโก ปรกมฺมายเน ยุตฺโต ปรภตฺตํ อปสฺสิโต ฯ รโหคโต นิสีทิตฺวา เอวํ จินฺเตสหํ ๑ ตทา พุทฺโธ โลเก สมุปฺปนฺโน อธิกาโร จ นตฺถิ เม ฯ กาโล คตึ เม โสเธตุํ ขโณ เม ปฏิปาทิโต ทุกฺโข นิรยสมฺผสฺโส อปุญฺญานํ หิ ปาณินํ ฯ เอวาหํ จินฺตยิตฺวาน กมฺมสามึ อุปาคมึ เอกาหํ กมฺมํ ยาจิตฺวา ปวนํ ปาวิสึ อหํ ฯ ติณกฏฺฐญฺจ วลฺลิญฺจ อาหริตฺวานหนฺตทา ติทณฺฑเก ฐเปตฺวาน อกํ ติณกุฏึ อหํ ฯ สงฺฆสฺสตฺถาย กุฏิกํ นิยฺยาเทตฺวาน ตํ อหํ ตทเหเยว อาคนฺตฺวา กมฺมาสามึ อุปาคมึ ฯ เตน กมฺเมน สุกเตน ตาวตึสํ อคญฺฉหํ ตตฺถ เม สุกตํ พฺยมฺหํ ติณกุฏิกาย ๒ นิมฺมิตํ ฯ #๑ ยุ. ___ จินฺเตสิ ตาวเท ฯ ๒ ม. กุฏิกาย สุนิมฺมิตํ ฯ