จตุตฺตึโส คนฺโธทกวคฺโค ปฐมํ คนฺธธูปิยตฺเถราปทานํ (๓๓๑)

---

[๓๓๓] สิทฺธตฺถสฺส ภควโต คนฺธธูปํ อทาสหํ สุมเนหิ ปฏิจฺฉนฺนํ พุทฺธานุจฺฉวิกญฺจ ตํ ฯ กญฺจนคฺฆิยสงฺกาสํ พุทฺธํ โลกคฺคนายกํ อินฺทีวรํว ชลิตํ อาทิตฺตํว หุตาสนํ ฯ พฺยคฺฆุสภํว ปรมํ อภิชาตํว เกสรึฟ นิสินฺนํ สมณานคฺคํ ภิกฺขุสงฺฆปุรกฺขตํ ฯ ทิสฺวา จิตฺตํ ปสาเทตฺวา ปคฺคเหตฺวาน อญฺชลึ วนฺทิตฺวา สตฺถุโน ปาเท ปกฺกามึ อุตฺตรามุโข ฯ จตุนวุเต อิโต กปฺเป ยํ คนฺธมททึ ตทา ทุคฺคตึ นาภิชานามิ คนฺธปูชายิทํ ผลํ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา คนฺธธูปิโย เถโร อิมา คาถาโย อภาสิตฺถาติ ฯ คนฺธธูปิยตฺเถรสฺส อปทานํ สมตฺตํ ฯ