ปญฺจวีสสหสฺสมฺหิ กปฺปานํ มนุชาธิปา อพฺพุทนิรพฺพุทานิ อฏฺฐฏฺฐาสึสุ ขตฺติยา ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา นิคฺคุณฺฑิปุปฺผิโย เถโร อิมา คาถาโย อภาสิตฺถาติ ฯ นิคฺคุณฺฑิปุปฺผิยตฺเถรสฺส อปทานํ สมตฺตํ ฯ อฏฺฐมํ สุมนาเวฬิยตฺเถราปทานํ (๓๒๘)

---

[๓๓๐] เวสฺสภุสฺส ภควโต โลกเชฏฺฐสฺส ตาทิโน สพฺเพ ชนา สมาคมฺม มหาปูชํ กโรนฺติ เต ฯ สุธาย ปิณฺฑํ กตฺวาน อาเวฬํ สุมนายหํ สีหาสนสฺส ปุรโต อภิโรเปสหํ ตทา ฯ สพฺเพ ชนา สมาคมฺม เปกฺขนฺติ ปุปฺผมุตฺตมํ เกนิทํ ปูชิตํ ปุปฺผํ พุทฺธเสฏฺฐสฺส ตาทิโน ฯ เตน จิตฺตปฺปสาเทน นิมฺมานํ อุปปชฺชหํ อนุโภมิ ๑ สกํ กมฺมํ ปุพฺเพ สุกตมตฺตโน ฯ ยํ ยํ โยนูปปชฺชามิ เทวตฺตํ อถ มานุสํ สพฺเพสานํ ปิโย โหมิ ปุปฺผปูชายิทํ ผลํ ฯ #๑ ม. อนุโภสึ ฯ