ชาติยา สตฺตวสฺเสน ๑ อารามํ ปาวิสึ อหํ โคตมสฺส ภควโต สกฺยปุตฺตสฺส ตาทิโน ฯ วิตฺถาริเก ปาวจเน พาหุชญฺญมฺหิ สาสเน อทฺทสํ สาสนํ กาเร ภิกฺขโว ตตฺถ สตฺถุโน ฯ สาวตฺถิ นาม นครํ ราชา ตตฺถาสิ โกสโล รเถน นาคยุตฺเตน อุเปสิ โพธิมุตฺตมํ ฯ ตสฺสาหํ นาคํ ทิสฺวาน ปุพฺพกมฺมํ อนุสฺสรึ อญฺชลึ ปคฺคเหตฺวาน สมยํ อคมาสหํ ฯ ชาติยา สตฺตวสฺโสว ปพฺพชึ อนคาริยํ โย โส พุทฺธํ อุปฏฺฐาสิ อานนฺโท นาม สาวโก ฯ คติมา ธิติมา เจว สติมา จ พหุสฺสุโต รญฺโญ จิตฺตํ ปสาเทนฺโต นิยฺยาเทสิ มหาชุติ ฯ ตสฺสาหํ ธมฺมํ สุตฺวาน ปุพฺพกมฺมํ อนุสฺสรึ ตตฺเถว ฐิตโก สนฺโต อรหตฺตํ อปาปุณึ ฯ เอกํสํ จีวรํ กตฺวา สิเร กตฺวาน อญฺชลึ สมฺพุทฺธํ อภิวาเทตฺวา อิมํ วาจํ อุทีรยึ ฯ ปทุมุตฺตรพุทฺธสฺส ทิปทินฺทสฺส ตาทิโน ๒ นิคุณฺฑิปุปฺผํ ปคฺคยฺห สีหาสเน ฐเปสหํ ฯ เตน กมฺเมน ทิปทินฺท โลกเชฏฺฐ นราสภ ปตฺโตมฺหิ อจลํ ฐานํ หิตฺวา ชยปราชยํ ฯ #๑ ม. สตฺตวสฺโสว ฯ ๒ ม. ยุ. สตฺถุโน ฯ