ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สมฺปสาทิโก ๑ เถโร อิมา คาถาโย อภาสิตฺถาติ ฯ สมฺปสาทิกตฺเถรสฺส อปทานํ สมตฺตํ ฯ สตฺตมํ อารามทายกตฺเถราปทานํ (๓๐๗)

---

[๓๐๙] สิทฺธตฺถสฺส ภควโต อาราโม โรปิโต มม ๒ สีตจฺฉาเยสุ ๓ รุกฺเขสุ อุปาสนฺเตสุ ๔ ปกฺขิสุ ฯ อทฺทสํ วิรชํ พุทฺธํ อาหุตีนํ ปฏิคฺคหํ อารามํ อตินาเมสึ โลกเชฏฺฐํ นราสภํ ฯ หฏฺโฐ หฏฺเฐน จิตฺเตน ผลํ ปุปฺผญฺจทาสหํ ๕ ตโต ชาตปฺปสาโท จ ๖ ตํ ทานํ ๗ ปริณามยึ ฯ พุทฺธสฺส ยมิทํ ทาสึ วิปฺปสนฺเนน เจตสา ภเว นิพฺพตฺตมานมฺหิ นิพฺพตฺตติ ผลํ มม ฯ จตุนวุเต อิโต กปฺเป ยํ อารามมทํ ๘ ตทา ทุคฺคตึ นาภิชานามิ อารามสฺส อิทํ ผลํ ฯ สตฺตตึเส อิโต กปฺเป สตฺตาสุํ มุทุสีตลา สตฺตรตนสมฺปนฺนา จกฺกวตฺตี มหพฺพลา ฯ #๑ ม. สมฺปสาทโก ฯ ๒ ม. มยา ฯ ๓ ม. สนฺทจฺฉาเยสุ ___ ฯ #๔ ยุ. อุปวตฺเตสุ ฯ ๕ ม. ปุปฺผมทาสหํ ฯ ๖ ม. ว ฯ ๗ ม. ___ วนํ ฯ #๘ ยุ. ___ ทานมททึ ___ ฯ