วาตํว ชาลมฺหิ อสชฺชมานํ ปทุมํว ๑ โตเยน อลิมฺปมานํ ๒ เนตารมญฺเญสมนญฺญเนยฺยํ ตํ วาปิ ธีรา มุนิ เวทยนฺติ ฯ โย โอคหเณ ถมฺโภริวาภิชายติ ยสฺมึ ปเร วาจาปริยนฺตํ วทนฺติ ตํ วีตราคํ สุสมาหิตินฺทฺริยํ ตํ วาปิ ธีรา มุนิ เวทยนฺติ ฯ โย เว ฐิตตฺโต ตสรํว อุชฺชุํ ๓ ชิคุจฺฉติ กมฺเมหิ ปาปเกหิ วีมํสมาโน วิสมํ สมญฺจ ตํ วาปิ ธีรา มุนิ เวทยนฺติ ฯ โย สญฺญตตฺโต น กโรติ ปาปํ ทหโร จ มชฺโฌ จ มุนี ยตตฺโต อโรสเนยฺโย น ๔ โรเสติ กญฺจิ ตํ วาปิ ธีรา มุนิ เวทยนฺติ ฯ ยทคฺคโต มชฺฌโต เสสโต วา ปิณฺฑํ ลเภถ ปรทตฺตูปชีวี นาลํ ถุตุํ นาปิ ๕ นิปจฺจวาที ตํ วาปิ ธีรา มุนิ เวทยนฺติ ฯ #๑ ม. ปทฺมํว ฯ ๒ โป. ม. ยุ. อลิปฺปมานํ ฯ ๓ โป. ม. อุชฺชู ฯ ๔ ม. #น โส โรเสติ ฯ ยุ. โส น โรเสติ ฯ ๕ ม. ยุ. โนปิ ฯ