อฏฺฐมํ อาลุวทายกตฺเถราปทานํ (๒๗๘)

---

[๒๘๐] ปพฺพเต หิมวนฺตมฺหิ มหาสินฺธุ สุทสฺสโน ๑ ตตฺถทฺทสํ วีตราคํ สมฺปภาสํ สุทสฺสนํ ฯ ปรโมปสเม ยุตฺตํ ทิสฺวา วิมฺหิตมานโส ๒ อาลุวํ ตสฺส ปาทาสึ ปสนฺโน เสหิ ปาณิหิ ฯ เอกตฺตึเส อิโต กปฺเป ยํ อาลุวมทาสหํ ๓ ทุคฺคตึ นาภิชานามิ อาลุวสฺส อิทํ ผลํ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อาลุวทายโก เถโร อิมา คาถาโย อภาสิตฺถาติ ฯ อาลุวทายกตฺเถรสฺส อปทานํ สมตฺตํ ฯ นวมํ ปุณฺฑรีกตฺเถราปทานํ (๒๗๙)

---

[๒๘๑] โรมโส นาม นาเมน สยมฺภู สปฺปโภ ๔ ตทา ปุณฺฑรีกํ มยา ทินฺนํ วิปฺปสนฺเนน เจตสา ฯ จตุนวุเต อิโต กปฺเป ปุณฺฑรีกมททึ ตทา ทุคฺคตึ นาภิชานามิ ปุณฺฑรีกสฺสิทํ ผลํ ฯ #๑ ม. สุทสฺสนา ฯ ๒ ยุ. ... ตํ วิมฺหิตาสโย ฯ ๓ ม. ยํ ผลมททึ ตทา ฯ #ยุ. ... อาลุวมทํ ตทา ฯ ๔ ม. สุพฺพโต ฯ