พระสุตันตปิฎกบาลี: 32/356/273 274
สุตฺตนฺตปิฏเก ขุทฺทกนิกายสฺส อปทานภาค ๑
อฏฺฐวีสติโม สุวณฺณพิพฺโพหนวคฺโค
ปฐมํ สุวณฺณพิพฺโพหนิยตฺเถราปทานํ (๒๗๑)
[๒๗๓] เอกาสนํ อหมทํ ปสนฺโน เสหิ ปาณิหิh
พิพฺโพหนญฺจ ปาทาสึ อุตฺตมตฺถสฺส ปตฺติยา ฯ
เอกนวุเต อิโต กปฺเป พิพฺโพหนมทาสหํ
ทุคฺคตึ นาภิชานามิ พิพฺโพหนสฺสิทํ ผลํ ฯ
อิโต เตสฏฺฐิเม กปฺเป อสโม นาม ขตฺติโย
สตฺตรตนสมฺปนฺโน จกฺกวตฺติ มหพฺพโล ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา สุวณฺณพิพฺโพหนิโย เถโร อิมา คาถาโย
อภาสิตฺถาติ ฯ
สุวณฺณพิพฺโพหนิยตฺเถรสฺส อปทานํ สมตฺตํ ฯ
ทุติยํ ติลมุฏฺฐิยตฺเถราปทานํ (๒๗๒)
[๒๗๔] มม สงฺกปฺปมญฺญาย สตฺถา โลกคฺคนายโก
มโนมเยน กาเยน อิทฺธิยา อุปสงฺกมิ ฯ
สตฺถารํ อุปสงฺกนฺตํ วนฺทิตฺวา ปุริสุตฺตมํ
ปสนฺนจิตฺโต สุมโน ติลมุฏฺฐิมทาสหํ ฯ
