ฉพฺพีสติโม โถมกวคฺโค ปฐมํ โถมกตฺเถราปทานํ (๒๕๑)

---

[๒๕๓] เทวโลเก ฐิโต สนฺโต วิปสฺสิสฺส มเหสิโน ธมฺมํ สุตฺวาน มุทิโต อิมํ วาจํ อภาสหํ ฯ นโม เต ปุริสาชญฺญ นโม เต ปุริสุตฺตม พหุชฺชนํ ตารยสิ เทเสนฺโต อมตํ ปทํ ฯ เอกนวุเต อิโต กปฺเป ยํ วาจํ อภณึ ตทา ทุคฺคตึ นาภิชานามิ โถมนาย อิทํ ผลํ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โถมโก เถโร อิมา คาถาโย อภาสิตฺถาติ ฯ โถมกตฺเถรสฺส อปทานํ สมตฺตํ ฯ ทุติยํ เอกาสนทายกตฺเถราปทานํ (๒๕๒)

---

[๒๕๔] วิชหิตฺวา เทววณฺณํ สภริโย อิธาคมึ อธิการํ กตฺตุกาโม พุทฺธเสฏฺฐสฺส สาสเน ฯ เทวโล นาม นาเมน ปทุมุตฺตรสาวโก ตสฺส ภิกฺขา มยา ทินฺนา วิปฺปสนฺเนน เจตสา ฯ