เอกตฺตึเส อิโต กปฺเป ยํ ปุปฺผมภิทาสหํ ทุคฺคตึ นาภิชานามิ สาลปุปฺผสฺสิทํ ผลํ ฯ อิโต จุทฺทสกปฺปมฺหิ อโหสึ อมิตญฺชโล สตฺตรตนสมฺปนฺโน จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สาลปุปฺผิโย เถโร อิมา คาถาโย อภาสิตฺถาติ ฯ สาลปุปฺผิยตฺเถรสฺส อปทานํ สมตฺตํ ฯ จตุตฺถํ กิลญฺชทายกตฺเถราปทานํ (๒๓๔)

---

[๒๓๖] ติวรายํ ปุเร รมฺเม นฬกาโร อหํ ตทา สิทฺธตฺเถ โลกปชฺโชเต ปสนฺนา ชนตา ตหึ ฯ ปูชตฺถํ โลกนาถสฺส กิลญฺชํ ปริเยสติ พุทฺธปูชํ กโรนฺตานํ กิลญฺชํ อททํ ๑ อหํ ฯ จตุนวุเต อิโต กปฺเป ยํ กมฺมมกรึ ตทา ทุคฺคตึ นาภิชานามิ กิลญฺชสฺส อิทํ ผลํ ฯ สตฺตสตฺตติกปฺปมฺหิ ราชา อาสิ ชลนฺธโร ๒ สตฺตรตนสมฺปนฺโน จกฺกวตฺติ มหพฺพโล ฯ #๑ ม. อททึ ฯ ๒ ยุ. ชุตินฺธโร ฯ