จมฺมขณฺฑํ มยา ทินฺนํ สิขิโน โลกพนฺธุโน เตน กมฺเมน ทิปทินฺท โลกเชฏฺฐ นราสภ ฯ สมฺปตฺตึ อนุโภตฺวาน กิเลเส ฌาปยึ อหํ ธาเรมิ อนฺติมํ เทหํ สมฺมาสมฺพุทฺธสาสเน ฯ เอกตฺตึเส อิโต กปฺเป อชินํ ยํ อทาสหํ ทุคฺคตึ นาภิชานามิ อชินสฺส อิทํ ผลํ ฯ อิโต ปญฺญาสเก ๑ กปฺเป ราชา อาสึ สุทายโก สตฺตรตนสมฺปนฺโน จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อชินทายโก เถโร อิมา คาถาโย อภาสิตฺถาติ ฯ อชินทายกตฺเถรสฺส อปทานํ สมตฺตํ ฯ ตติยํ เทฺวรตนิยตฺเถราปทานํ (๒๒๓)

---

[๒๒๕] มิคลุทฺโธ ๒ ปุเร อาสึ อรญฺเญ กานเน อหํ อทฺทสํ วิรชํ พุทฺธํ อาหุตีนํ ปฏิคฺคหํ ฯ มํสเปสิ มยา ทินฺนา วิปสฺสิสฺส มเหสิโน สเทวกสฺมิ โลกสฺมึ อิสฺสรํ การยามหํ ฯ #๑ ม. ยุ. ปญฺจมเก ฯ ๒ ม. ยุ. มิคลุทฺโท ฯ อิโต ปรํ อีทิสเมว ฯ