กิเลสา ฌาปิตา มยฺหํ ภวา สพฺเพ สมูหตา ธาเรมิ อนฺติมํ เทหํ สมฺมาสมฺพุทฺธสาสเน ฯ เทฺวนวุเต อิโต กปฺเป ยํ กมฺมมกรึ ตทา ทุคฺคตึ นาภิชานามิ ตาลวณฺฏสฺสิทํ ผลํ ฯ เตสฏฺฐิมฺหิ อิโต กปฺเป มหารามสนามโก ๑ สตฺตรตนสมฺปนฺโน จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ตาลวณฺฏทายโก เถโร อิมา คาถาโย อภาสิตฺถาติ ฯ ตาลวณฺฏทายกตฺเถรสฺส อปทานํ สมตฺตํ ฯ อฏฺฐมํ อกฺกนฺตสญฺญกตฺเถราปทานํ (๒๑๘)

---

[๒๒๐] กุสาฏกํ คเหตฺวาน อุปชฺฌายสฺส ปารุเป ๒ มนฺตญฺจ อนุสิกฺขามิ คณฺฑเภทสฺส ๓ ปตฺติยา ฯ อทฺทสํ วิรชํ พุทฺธํ อาหุตีนํ ปฏิคฺคหํ อุสภํ ปวรํ อคฺคํ ติสฺสํ พุทฺธํ คชุตฺตมํ ๔ ฯ กุสาฏกํ ปตฺถริตํ อกฺกมนฺตํ นรุตฺตมํ สมุคฺคตํ มหาวีรํ โลกเชฏฺฐํ นราสภํ ฯ #๑ ยุ. มหารามาสุนามกา ฯ ๒ ม. ยุ. อุปชฺฌายสฺสหํ ปุเร ฯ ... มหพฺพลา #๓ ม. คนฺถาโทสสฺส ฯ ๔ ม. คณุตฺตมํ ฯ