อิตฺถํ สุทํ อายสฺมา เอกสญฺญโก เถโร อิมา คาถาโย อภาสิตฺถาติ ฯ เอกสญฺญกตฺเถรสฺส อปทานํ สมตฺตํ ฯ ปญฺจมํ รํสิสญฺญกตฺเถราปทานํ (๒๑๕)

---

[๒๑๗] อุเทนฺตํ สตรํสีว ปีตรํสีว ๑ ภาณุมํ พฺยคฺฆุสภํว ปวรํ สุชาตํ ปพฺพตนฺตเร ฯ พุทฺธสฺส อานุภาโว โส ชลเต ปพฺพตนฺตเร รํเส จิตฺตํ ปสาเทตฺวา กปฺปํ สคฺคมฺหิ โมทหํ ฯ อวเสเสสุ กปฺเปสุ กุสลํ กริตํ ๒ มยา เตน จิตฺตปฺปสาเทน พุทฺธานุสฺสติยาปิจ ฯ ตึสกปฺปสหสฺเสโต ยํ สญฺญมลภึ ตทา ทุคฺคตึ นาภิชานามิ พุทฺธสญฺญายิทํ ผลํ ฯ สตฺตปญฺญาสกปฺปมฺหิ เอโก อาสึ ชนาธิโป สุชาโต นาม นาเมน จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา รํสิสญฺญโก เถโร อิมา คาถาโย อภาสิตฺถาติ ฯ รํสิสญฺญกตฺเถรสฺส อปทานํ สมตฺตํ ฯ #๑ ยุ. วีตรํสีว ฯ ๒ ม. จริตํ ฯ ยุ. ตีริตํ ฯ