จริมํ วตฺตเต มยฺหํ ภวา สพฺเพ สมูหตา ธาเรมิ อนฺติมํ เทหํ สมฺมาสมฺพุทฺธสาสเน ฯ เทฺวนวุเต อิโต กปฺเป ยํ ฉตฺตมททึ ตทา ทุคฺคตึ นาภิชานามิ ฉตฺตทานสฺสิทํ ผลํ ฯ เทฺวสตฺตติ อิโต กปฺเป อฏฺฐาสึสุ ชนาธิปา มหานิทานนาเมน ราชาโน จกฺกวตฺติโน ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปาปนิวาริโย เถโร อิมา คาถาโย อภาสิตฺถาติ ฯ ปาปนิวาริยตฺเถรสฺส อปทานํ สมตฺตํ ฯ อุทฺทานํ กณิกาโร มิเนลญฺจ กึกณิ ตารเณน จ นิคฺคุณฺฑิปุปฺผํ ทกโท สลโฬ จ กุรณฺฑโก อาธารทานํ ปาปญฺจ อฏฺฐตาฬีส คาถกา ฯ กณิการปุปฺผิยวคฺโค เอกวีสติโม ฯ ________________________