เอกตฺตึเส อิโต กปฺเป ยํ ปุปฺผมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ เอกูนตึเส กปฺปมฺหิ สุเมฆฆนนามโก สตฺตรตนสมฺปนฺโน จกฺกวตฺติ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา มิเนลปุปฺผิโย เถโร อิมา คาถาโย อภาสิตฺถาติ ฯ มิเนลปุปฺผิยตฺเถรสฺส อปทานํ สมตฺตํ ฯ ตติยํ กึกณิกปุปฺผิยตฺเถราปทานํ (๒๐๓)

---

[๒๐๕] กญฺจนคฺฆิยสงฺกาโส สพฺพญฺญู โลกนายโก โอทกํ ทหโมคฺคยฺห สินายิ โลกนายโก ฯ ปคฺคยฺห กึกณิปุปฺผํ วิปสฺสิสฺสาภิโรปยึ อุทคฺคจิตฺโต สุมโน ทิปทินฺทสฺส ตาทิโน ฯ เอกนวุเต อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ สตฺตวีสติกปฺปมฺหิ ราชา ภิมรโถ อหุ สตฺตรตนสมฺปนฺโน จกฺกวตฺติ มหพฺพโล ฯ