พระสุตันตปิฎกบาลี: 16/300/641 642 643
สุตฺตนฺตปิฏเก สํยุตฺตนิกายสฺส นิทานวคฺโค
โคฆาตโก อโหสิ โส ตสฺส กมฺมสฺส วิปาเกน พหูนิ วสฺสานิ
พหูนิ วสฺสสตานิ พหูนิ วสฺสสหสฺสานิ พหูนิ วสฺสสตสหสฺสานิ
นิรเย ปจิตฺถ ๑ ตสฺเสว กมฺมสฺส วิปากาวเสเสน เอวรูปํ
อตฺตภาวปฏิลาภํ ปฏิสํเวทยตีติ ฯ ปฐมํ ฯ
[สพฺเพสํ สุตฺตนฺตานํ เอเสว เปยฺยาโล]
[๖๔๑] อิธาหํ อาวุโส คิชฺฌกูฏา ปพฺพตา โอโรหนฺโต อทฺทสํ
มํสเปสึ เวหาสํ คจฺฉนฺตึ ๒ ตเมนํ คิชฺฌาปิ กากาปิ กุลลาปิ
อนุปติตฺวา อนุปติตฺวา วิตจฺเฉนฺติ วิราเชนฺติ ๓ สา สุทํ อฏฺฏสฺสรํ
กโรติ ฯ เอโส ภิกฺขเว สตฺโต อิมสฺมิญฺเญว ราชคเห โคฆาตโก
อโหสิ ฯ ทุติยํ ฯ
[๖๔๒] อิธาหํ อาวุโส คิชฺฌกูฏา ปพฺพตา โอโรหนฺโต อทฺทสํ
มํสปิณฺฑํ เวหาสํ คจฺฉนฺตํ ตเมนํ คิชฺฌาปิ กากาปิ กุลลาปิ
อนุปติตฺวา อนุปติตฺวา วิตจฺเฉนฺติ วิราเชนฺติ โส สุทํ อฏฺฏสฺสรํ
กโรติ ฯ เอโส ภิกฺขเว สตฺโต อิมสฺมิญฺเญว ราชคเห สากุณิโก
อโหสิ ฯ ตติยํ ฯ
[๖๔๓] อิธาหํ อาวุโส คิชฺฌกูฏา ปพฺพตา โอโรหนฺโต อทฺทสํ
นิจฺฉวึ ปุริสํ เวหาสํ คจฺฉนฺตํ ตเมนํ คิชฺฌาปิ กากาปิ กุลลาปิ
อนุปติตฺวา อนุปติตฺวา วิตจฺเฉนฺติ วิราเชนฺติ โส สุทํ อฏฺฏสฺสรํ
กโรติ ฯ เอโส ภิกฺขเว สตฺโต อิมสฺมิญฺเญว ราชคเห โอรพฺภิโก
อโหสิ ฯ จตุตฺถํ ฯ
#๑ ม. ปจฺจิตฺวา ฯ ยุ. ปจิตฺวา ฯ ๒ ยุ. คจฺฉนฺตํ ฯ
#๓ ยุ. วิภเชนฺติ ฯ เอวมุปริปิ ฯ
