รตฺติกํ ปุปฺผิตํ ทิสฺวา กุฏชํ ธรณีรุหํ สมูลํ ปคฺคเหตฺวาน อุปเนสึ มเหสิโน ฯ เอกนวุเต อิโต กปฺเป ยํ ปุปฺผมภิโรปยึ ทุคฺคตึ นาภิชานามิ ปุปฺผทานสฺสิทํ ผลํ ฯ อิโต จ อฏฺฐเม กปฺเป สุปฺปสนฺนสนามโก สตฺตรตนสมฺปนฺโน จกฺกวตฺติ ๑ มหพฺพโล ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา รตฺติยปุปฺผิโย ๒ เถโร อิมา คาถาโย อภาสิตฺถาติ ฯ รตฺติยปุปฺผิยตฺเถรสฺส อปทานํ สมตฺตํ ฯ จตุตฺถํ อุทปานทายกตฺเถราปทานํ (๑๗๔)

---

[๑๗๖] วิปสฺสิโน ภควโต อุทปาโน กโต มยา ปิณฺฑปาตํ ๓ คเหตฺวาน นิยฺยาเทสึ อหํ ตทา ฯ เอกนวุเต อิโต กปฺเป ยํ กมฺมมกรึ ตทา ทุคฺคตึ นาภิชานามิ อุทปานสฺสิทํ ผลํ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ #๑ ม. ราชาโหสึ มหพฺพโล ฯ ยุ. ราชาโหสิ ... ฯ ๒ ม. ยุ. รตฺติปุปฺผิโย ฯ #๓ ม. ปิณฺฑปาตญฺจ ทตฺวาน ฯ ยุ. ปิณฺฑปาตญฺจ ททิตฺวาน ฯ