เตน กมฺเมนหํ อชฺช อภิโภมิ นรามเร ธาเรมิ อนฺติมํ เทหํ สมฺมาสมฺพุทฺธสาสเน ฯ จตุนวุเต อิโต กปฺเป ยํ ปุปฺผมภิโรปยึ ทุคฺคตึ นาภิชานามิ ปุปฺผปูชายิทํ ผลํ ฯ สมนฺตคนฺธนามาสุํ เตรส จกฺกวตฺติโน อิโต ปญฺจมเก กปฺเป จาตุรนฺตา คณาธิปา ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปทปูชโก เถโร อิมา คาถาโย อภาสิตฺถาติ ฯ ปทปูชกตฺเถรสฺส อปทานํ สมตฺตํ ฯ ปญฺจมํ มุฏฺฐิปุปฺผิยตฺเถราปทานํ (๑๐๕)

---

[๑๐๗] สุทสฺสโนติ นาเมน มาลากาโร อหํ ตทา อทฺทสํ วิรชํ พุทฺธํ โลกเชฏฺฐํ นราสภํ ฯ ชาติปุปฺผํ คเหตฺวาน ปูชยึ ปทุมุตฺตรํ วิสุทฺธจกฺขุ สุมโน ทิพฺพจกฺขุํ สมชฺฌคํ ฯ เอติสฺสา พุทฺธปูชาย จิตฺตสฺส ปณิธีหิ จ กปฺปานํ สตสหสฺสํ ทุคฺคตึ นูปปชฺชหํ ฯ