อิตฺถํ สุทํ อายสฺมา มธุปิณฺฑิโก เถโร อิมา คาถาโย อภาสิตฺถาติ ฯ มธุปิณฺฑิกตฺเถรสฺส อปทานํ สมตฺตํ ฯ อฏฺฐมํ เสนาสนทายกตฺเถราปทานํ (๙๘)

---

[๑๐๐] สิทฺธตฺถสฺส ภควโต อทาสึ ปณฺณสนฺถรํ สมนฺตา อุปการญฺจ กุสุมํ โอกิรึ อหํ ฯ ปาสาเท ๑ จ คุหํ รมฺมํ อนุโภมิ มหารหํ มหคฺฆานิ จ ปุปฺผานิ สยเนภิวสฺสนฺติ ๒ เม ฯ สยเนหํ ตุวฏฺฏามิ วิจิตฺเต ปุปฺผสนฺถเต ปุปฺผวุฏฺฐิ จ สยเน อภิวสฺสติ ตาวเท ฯ จตุนวุเต อิโต กปฺเป อทาสึ ปณฺณสนฺถรํ ทุคฺคตึ นาภิชานามิ สนฺถรสฺส อิทํ ผลํ ฯ ฐิตาสนฺถารกา ๓ นาม สตฺเตเต จกฺกวตฺติโน อิโต เต ปญฺจเม กปฺเป อุปฺปชฺชึสุ ชนาธิปา ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เสนาสนทายโก เถโร อิมา คาถาโย อภาสิตฺถาติ ฯ เสนาสนทายกตฺเถรสฺส อปทานํ สมตฺตํ ฯ #๑ ม. ปาสาเทวํ คุณํ รมฺมํ ฯ ๒ ม. ยุ. สยเนภิสวนฺเต เม ฯ ๓ ม. ติณสนฺถรกา นาม ฯ