พระสุตันตปิฎกบาลี: 32/188/90 91
สุตฺตนฺตปิฏเก ขุทฺทกนิกายสฺส อปทานภาค ๑
อฏฺฐมํ สทฺทสญฺญกตฺเถราปทานํ (๘๘)
[๙๐] ปพฺพเต หิมวนฺตมฺหิ วสามิ ปณฺณสนฺถเร
ผุสฺสสฺส ธมฺมํ ภณโต สทฺเท จิตฺตํ ปสาทยึ ฯ
เทฺวนวุเต อิโต กปฺเป ยํ กมฺมมกรึ ตทา
ทุคฺคตึ นาภิชานามิ ปุญฺญกมฺมสฺสิทํ ผลํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา สทฺทสญฺญโก เถโร อิมา คาถาโย
อภาสิตฺถาติ ฯ
สทฺทสญฺญกตฺเถรสฺส อปทานํ สมตฺตํ ฯ
นวมํ โพธิสิญฺจกตฺเถราปทานํ (๘๙)
[๙๑] วิปสฺสิสฺส ภควโต มหาโพธิมโห อหุ
ปพฺพชฺชูปคโต สนฺโต อุปคญฺฉิมหํ ตทา ฯ
กุสุมฺโภทกมาทาย ๑ โพธิยา โอกิรึ อหํ
โมจยิสฺสติ โน มุตฺโต นิพฺพาเปสฺสติ นิพฺพุโต ฯ
เอกนวุเต อิโต กปฺเป ยํ โพธึ อภิสิญฺจหํ
ทุคฺคตึ นาภิชานามิ โพธิสิญฺจสฺสิทํ ๒ ผลํ ฯ
#๑ ม. กุสุโมทกมาทาย ฯ ๒ ม. โพธิสิญฺจายิทํ ผลํ ฯ
