พระสุตันตปิฎกบาลี: 32/172/74 75
สุตฺตนฺตปิฏเก ขุทฺทกนิกายสฺส อปทานภาค ๑
ทุติยํ ปทสญฺญกตฺเถราปทานํ (๗๒)
[๗๔] อกฺกนฺตญฺจ ปทํ ทิสฺวา ติสฺสสฺสาทิจฺจพนฺธุโน
หฏฺโฐ หฏฺเฐน จิตฺเตน ปเท จิตฺตํ ปสาทยึ ฯ
เทฺวนวุเต อิโต กปฺเป ยํ สญฺญมลภึ ตทา
ทุคฺคตึ นาภิชานามิ ปทสญฺญายิทํ ผลํ ฯ
อิโต สตฺตมเก กปฺเป สุเมโธ นาม ขตฺติโย
สตฺตรตนสมฺปนฺโน จกฺกวตฺติ มหพฺพโล ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา ปทสญฺญโก เถโร อิมา คาถาโย
อภาสิตฺถาติ ฯ
ปทสญฺญกตฺเถรสฺส อปทานํ สมตฺตํ ฯ
ตติยํ สุสญฺญกตฺเถราปทานํ (๗๓)
[๗๕] ทุมคฺเค ปํสุกูลิกํ ลคฺคํ ทิสฺวาน สตฺถุโน
ตโตหํ อญฺชลึ กตฺวา ปํสุกูลํ อวนฺทิหํ ฯ
เทฺวนวุเต อิโต กปฺเป ยํ กมฺมมกรึ ตทา
ทุคฺคตึ นาภิชานามิ ปํสุสญฺญายิทํ ๑ ผลํ ฯ
#๑ ม. ยุ. พุทฺธสญฺญายิทํ ฯ
