อตฺถทสฺสี ตุ ภควา สพฺพญฺญู วทตํ วโร มมุทฺธริตุกาโม โส อาคญฺฉิ ปพฺพตุตฺตมํ ฯ ปสทญฺจ มิคํ หนฺตฺวา ภกฺเขตุํ สมุปาคมึ ภควา ตมฺหิ สมเย ภิกฺขาจาโร ๑ อุปาคมิ ฯ วรมํสานิ ปคฺคยฺห อทาสิ ตสฺส สตฺถุโน อนุโมทิ มหาวีโร นิพฺพาเปนฺโต มมํ ตทา ฯ เตน จิตฺตปฺปสาเทน คิริทุคฺคปฺปวิสหํ ๒ ปีตึ อุปฺปาทยิตฺวาน ตตฺถ กาลกโต อหํ ฯ เอเตน มํสทาเนน จิตฺตสฺส ปณิธีหิ จ ปณฺณรเส กปฺปสเต เทวโลเก รมึ อหํ ฯ อวเสเสสุ กปฺเปสุ กุสลํ กริตํ ๓ มยา เตเนว มํสทาเนน พุทฺธานุสฺสรเณน จ ฯ อฏฺฐตึสมฺหิ กปฺปมฺหิ อฏฺฐ ทีฆายุนามกา สฏฺฐิมฺหิโต กปฺปสเต ทุเว สรณนามกา ๔ ฯ ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สุจินฺติโต เถโร อิมา คาถาโย อภาสิตฺถาติ ฯ สุจินฺติตตฺเถรสฺส อปทานํ สมตฺตํ ฯ #๑ ม. ภิกฺขมาโน ฯ ยุ. ภิกฺขยาโน ฯ ๒ ม. คิริทุคฺคํ ปวิสํ อหํ ฯ ยุ. #คิริทุคฺคปฺปเวกฺขหํ ฯ ๓ ม. จินฺติตํ ฯ ๔ ม. ยุ. วรุณนามกา ฯ