พระสุตันตปิฎกบาลี: 19/153/552 553 554 555 556 557 558
สุตฺตนฺตปิฏเก สํยุตฺตนิกายสฺส มหาวารวคฺโค
[๕๕๒] กตโม จ ภิกฺขเว ปริยาโย ยํ ปริยายํ อาคมฺม
ปญฺจ นีวรณา ทส โหนฺติ ฯ
[๕๕๓] ยทปิ ภิกฺขเว อชฺฌตฺตํ กามจฺฉนฺโท ตทปิ นีวรณํ
ยทปิ พหิทฺธา กามจฺฉนฺโท ตทปิ นีวรณํ กามจฺฉนฺทนีวรณนฺติ
อิติ หิทํ อุทฺเทสํ อาคจฺฉติ ๑ ฯ ตทมินาเปตํ ปริยาเยน ทฺวยํ โหติ ฯ
[๕๕๔] ยทปิ ภิกฺขเว อชฺฌตฺตํ พฺยาปาโท ตทปิ นีวรณํ
ยทปิ พหิทฺธา พฺยาปาโท ตทปิ นีวรณํ พฺยาปาทนีวรณนฺติ
อิติ หิทํ อุทฺเทสํ อาคจฺฉติ ฯ ตทมินาเปตํ ปริยาเยน ทฺวยํ โหติ ฯ
[๕๕๕] ยทปิ ภิกฺขเว ถีนํ ตทปิ นีวรณํ ยทปิ มิทฺธํ
ตทปิ นีวรณํ ถีนมิทฺธนีวรณนฺติ อิติ หิทํ อุทฺเทสํ อาคจฺฉติ ฯ
ตทมินาเปตํ ปริยาเยน ทฺวยํ โหติ ฯ
[๕๕๖] ยทปิ ภิกฺขเว อุทฺธจฺจํ ตทปิ นีวรณํ ยทปิ
กุกฺกุจฺจํ ตทปิ นีวรณํ อุทฺธจฺจกุกฺกุจฺจนีวรณนฺติ อิติ หิทํ
อุทฺเทสํ อาคจฺฉติ ฯ ตทมินาเปตํ ปริยาเยน ทฺวยํ โหติ ฯ
[๕๕๗] ยทปิ ภิกฺขเว อชฺฌตฺตํ ธมฺเมสุ วิจิกิจฺฉา ตทปิ
นีวรณํ ยทปิ พหิทฺธา ธมฺเมสุ วิจิกิจฺฉา ตทปิ นีวรณํ
วิจิกิจฺฉานีวรณนฺติ อิติ หิทํ อุทฺเทสํ อาคจฺฉติ ฯ ตทมินาเปตํ
ปริยาเยน ทฺวยํ โหติ ฯ
[๕๕๘] อยํ โข ภิกฺขเว ปริยาโย ยํ ปริยายํ อาคมฺม ปญฺจ
นีวรณา ทส โหนฺติ ฯ
#๑ ม. คจฺฉติ ฯ เอวมุปริ ฯ
